காதலில் ஏது கள்ளம்..களவுதானே காதல்!

 பிரமிக்கிறோம்...
ஆனந்த அலை பரவுகிறது..
மீண்டும் அண்மைக்குத் தூண்டுகிறது...
ஆம்...
நாம் காதலிக்க ஆரம்பித்துவிட்டோம்!


காதல் ஒரு அழகான வார்த்தை..
காதலைப் போலவே!


காதலுக்கு இருட்டு தேவையில்லை...
வெளிச்சமே காதலைக் கொண்டுவரும்!


 காதலுக்கு ஒலி தேவையில்லை....
கண்கள் மட்டுமே போதும்!


காதலுக்கு அறிமுகமும் சிலசமயம் தேவைப்படும்..
அது  இங்கு பாசாங்கு எனப்படும்..!

காதல் என்பது அன்புஇல்லை..பாசமாகாது..
வேணும்னா பிரியம்னு வெச்சுக்கலாம்!

காதல் வயதறியாது..
ஈர்ப்பையே அறியும்!


காதல் புரிந்து கொள்ளாது..
ஆனால் காதல்காரரைத் தேடித் தவிக்கும்!


ஒருமுறை மட்டும் மலர்வதில்லை காதல்..
ஓராயிரம்முறை மலரும் ஆண்களுக்கு மட்டும்!
ஒரு'முறை'யோடு வருவது மட்டும் காதல் இல்லை..!
முறை மாறுவதும் காதலாகும் இங்கு!


காதல் கைதொடும்..தோள்படும்..பெரும்பாலும் படர்வதில்லை!
காதல் படர்ந்தால் கா..ஆமாகிவிடும்!



காதல் கண்களில் பிறந்து ..
பழக்கத்தில் வளர்ந்து
காலத்தில் மலர்ந்து
கல்யாணத்தில்
மணக்கிறது..
அன்றே மரிக்கிறது
காமம் பிறக்கிறது..
குடும்பம் தழைக்கிறது!


காதல் ஜெயிக்கும்னு ..ஜெயிக்கணும்னு
சொல்லிக் கேள்விபட்டிருப்பீங்க..!
ஜெயிக்கிறதுன்னா..கல்யாணத்துல முடியறது!
பெத்தவங்க சம்மதத்தோடோ..இல்லாமலோ!


காதல் தெய்வீகமானதாம்...ஆம்
காதலிப்பது பிறர் கண்களுக்குத் தெரியாதவரையில்!


காதலில் ஏது கள்ளம்...
களவுதானே காதல்!

காதல் என்பது உறவற்றது...
உறவானால் அங்கு பெயர் மாறிவிடும்!

காதலில் ஆபத்தில்லை...பிரியம் மட்டுமே!
காதல் இங்கும் எங்கும் என்றும் புனிதமானதே...!

காதல் என்றும் வாழும்..வாழ்க!

ரசிகனே காதலன்... காதலனே கவிஞன்!

 இயந்திரத்துக்குள் வருவதில்லை..
ரசனை!
இதயத்தில்..இதயத்துள் மலர்வது..
ஈர்ப்பு!
ரசனையும்  ஈர்ப்பும்  பிரசவிப்பது
அன்பு!
காதலாக வளர்ப்பது..
கவிதை!

ரசிகனே காதலன்...
காதலனே கவிஞன்!


கவிதை எழுதா காதலன் ஏது?
கவிதையை விரும்பா காதலும் ஏது?






எழுதுவது புதுக்கவிதையாகினும்...கவிதை
எழுதுவது இங்கு மரபாக' வைக்கப்படும்!

காதலன் தான் கவிதை எழுதுவானோ..காதலி?

அவளுக்குத் தெரியும்..கவிதைகள்

பொய்யென்று!

அவள் பொய்யுரையாள்..

ஆனால் தன்மெய் போல் ரசிப்பாள்!

சில ஆண்டாள்களும் இங்கு உண்டு!

ரங்கன்கள் அதிகமில்லை!

கவிதைகள் சற்று நீண்ட குறுஞ்செய்திகள்!

எழுதியவர் மறந்து போகலாம்..!

காகித்தில் பேனா மையின் கறை போல

அன்புநெஞ்சத்தில் கறை கொண்டிருக்கும்...!

புதுக்கவிதை தான் இனிக்கும்..
அது முடிவில்லா தொடர்கதை..!
புதுப்புது கவிதைகள் முதலில் இனிக்கும்
ஒரு கட்டத்தில் இனிமையே விலகிடும்!


கவிதை எழுத வேண்டும்
என்பது கட்டாயமில்லை..
கண்களால் சொன்னாலும்
புரிந்து கொள்ளப்படும்..
நினைவில் ஏற்றிக் கொள்ளப்படும்!

விழிகள்...பேசுமே....மொழிகள்!

வீணை பேசும் அதை மீட்டும் விரல்களைக் கண்டு'
என்றான் கவிஞன்!
விழிகள் பேசும்  அதை வருடும்  மனங்களைக் கண்டு'
என்கிறான் ரசிகன்!


இலக்கின்றி
வெறிக்கும் விழிகள்!
படபடக்கும் இமைகளோடு
கள்ளமறியா விழிகள்...

கவ்வி இழுக்கும்
காந்த விழிகள்...
மீண்டும் பார்க்கத் தூண்டும்
தெய்வீக மலர்கள்...
கடுப்பைக் காட்டும் தீக்கங்குகள்!




வலையை வீசும்
குளத்து மீன்கள்..
மரபுகளைத் தாண்டி
மருளும் மான்கள்..!


எத்தனை எத்தனை மொழிகள்
படைக்கிறது
ஓசையின்றி  அவ்விழிகள்....!


அவை ஆரம்பித்த கதைகள் கணக்கில்லை...
சொல்லிய வார்த்தைகள் எண்ணவில்லை....
சொல்லாமல் விட்டவை இனிக்கவில்லை.....

அங்கே ஒலியில்லை..இசையில்லை
இலக்கணமில்லை..இணக்கம் மட்டுமே..
இலக்கியங்கள் மட்டும் ஏராளம்!
நினைவுகளோ தாராளம்!

அனுபவங்கள்.. விருந்தாளிகள்!

சுகமும்...புதியன தெரிந்த ஆனந்தமும்

சோகமும்..அலைச்சலால் வந்த எரிச்சலும்

கோபமும்..எதிர்பாராத தாக்குதல்களும்

அன்பும்..பிரதிபலன்பாராத உதவிகளும்....

பற்பல அனுபவங்கள்..

நாள்தோறும்..வேளைதோறும்

அவைகள் விருந்தாளிகள்..

சிலவை அழையா விருந்தாளிகள்!

வயதில் உடலிலும் மற்றுமா ? 

அனுவத்திலும்..கிடைக்கும்..!

சில மாற்றம்..பல ஏமாற்றம்!

உறவிலும் நட்பிலும் கடமையிலும் தேவையிலும்

பயணத்திலும் பக்கத்திலும்..கிடைக்கும் படிப்பினையே அனுபவம்!

முதன்முறை ஒன்றை புதிதாக எதிர்கொள்வதே..அனுபவம்!

தொடர்ந்தால்..பழகி விட்டால் அதுவே பழக்கம்!

பழக்கம் தொடர்வது..புது அனு பவத்திற்குத் தடைக்கல்..!

புதியப்புதிய எதிர்கொள்ளல்களே அனுபவம்!

அந்நியத்திலும் தொலைவிலும் தேவைகளாலும் அடைவது!

சிலவற்றை நோக்கியே நாம்..!

பலவை நம்மை சூழ்ந்து...

விரும்பியோ..கட்டாயத்தாலோ..தாட்சண்யத்தாலோ!

 அனுபவங்கள் விருந்தாளிகள்...விருந்தாளிகளால் அடைவது!

அதில் அழையா விருந்தாளிகளே அதிகம்!

புதுப்புது மனிதர்கள்..இடங்கள்

மாறும் காலங்கள்

மாறும் தலைமுறைகள்...

அனுபவக் களஞ்சியங்கள்..!

அவற்றில் சில கழுநீர் தொட்டிகள்!

மாற்றங்கள் சிரஞ்சீவி...மாறாதது!

மாற்றங்களே அனுபவங்கள்!

அனுபவங்கள் நல்ல ஆசான்கள்.. 

அடையாளம் காட்டும் ஆசான்கள்!

வாருங்கள் எதிர்கொள்வோம் அனுபங்களை!

இலக்கியமாக்கி படைத்திடுவோம்..இனியவைகளை!

எச்சரிக்கை பதிவுசெய்வோம்..கசடுகளை!

கொங்குநாட்டு அரிசிபருப்பு சாதம்!

அரிசிபருப்பு..பருப்பரிசி சாதம்னு எப்படி வேண்டுமானாலும் சொல்லலாம்..நம்ம விருப்பம் போல!

எங்க காங்கேயம் காளைக..அதிகமா வெளியில மேயாதுக..பருப்பரிசி சாதவாசனைய புடிச்சா, எங்க சுத்துனாலும் வூட்டுக்கு ஓடி வந்துடுங்க!
வாரத்துல ரெண்டு..மூணு தடவைக்குக் குறையாம, ஒவ்வொரு வூட்லயும் இத செஞ்சுடுவாங்க! பக்கவாத்யங்களோட ஆளாளுக்கு, மினி/மேக்ஸி ஹாட் பாக்ஸ் சாப்பாட்டை வெட்டிப்புடுவாங்க!

கண்ணால வூடுகள்ல கூட இந்த சாதத்தை பரிமாற ஆரம்பிச்சுட்டாங்கன்னா..பாத்துகோங்கோ..இதோட மகிமைய!

This One is nothing but.. Kongu version of BisibelaBath!


சாம்பார் சாதம், பிஸிபேளா பாத் மாதிரிதான், இந்த பருப்பரிசி சாதமும்..ஆனா..அதை யெல்லாம் மெய்ன் கோர்ஸா சாப்பிட முடியாது.! பருப்பரிசி சாதத்தை மெயின் கோர்ஸாக சாப்பிடலாம்!



ரெஸிபி மற்றும் செய்முறை! 

* புழுங்கல் அரிசி 2கப் + பருப்பு -அரை கப்..ரெண்டையும் ஒண்ணா சேர்த்துக் கழுவி, வடிக்காம 45 நிமிஷம் ஊற வைக்கணும்!

பருப்புன்னா..துவரம் பருப்பு தான்! துவரைக்கு பதிலா அவரைப்பருப்பு போட்டோம்னா..அது தனி டேஸ்ட்! மூணு தடவை துவரம்பருப்பு போட்டு செஞ்சோம்னா ஒரு தடவை அவரைப்பருப்பு போட்டு செய்யலாம்! பாசிப்பயிறு போடறவங்களும் உண்டு! அவங்க அவங்க டேஸ்ட் பட்ஸ்க்கு ஏத்த மாதிரி!

* எலுமிச்சை அளவுக்கு புளிய எடுத்து ஊறவெச்சு, வடிச்சு கரைசலை எடுத்து தனியா வெச்சுக்கோங்க!

* சின்ன வெங்காயம் உரிச்சது 100கி, மிளகாய் வத்தல் - 4, தக்காளி (நீளமா நறுக்கி) - 1, தாளிப்பு அயிட்டங்கள், உப்பு..மிளகாய் பொடி, பட்டை- சிறுசு, கிராம்பு - 1, சீரகம் - கொஞ்சூண்டு!


செய்முறை 1 / முதல்லய தாளிச்சுட்டு, பொறவு சாப்பாட்டையும் அதே குக்கர்ல சமைக்கிறது! எல்லாமும் உடனே முடிஞ்சிடும்..வேலை கம்மி!பிரியாணி மாதிரியே தான்!

செய்முறை 2 / சாதத்தை மட்டும் சமைச்சிட்டு, பொறவு வாணலியில தாளிக்கறது..ஃப்ரைட் ரைஸ் போல!வேலை ஜாஸ்தி..எண்ணெய் அதிகம்..டேஸ்டும் அதிகம்!





 முதல் முறையிலே செய்வோம்!

* குக்கர்ல 50மில்லி ஆயில் + பட்டை + கிராம்பு + சீரகம் + கடுகு + மிளகாய் வத்தல் + சின்னவெங்காயம் + கறி வேப்பிலை ..வரிசைப்படி..ஒவ்வொண்ணா சேர்த்து வதக்கணும்! 3-4 Mins.

* புளிக்கரைசல். (அரை கப்).கல்லுப்பு..மிளகாய்த்தூள்..மஞ்சத்தூள் எல்லாம் வரிசைப்படி சேர்க்கணும்..! 2-3 Mins.

* அடுத்து தண்ணி சேர்க்கணும்..ஒரு கப் அரிசிக்கு ரெண்டரை கப் தண்ணி..அப்ப ரெண்டுகப்புக்கு 5 கப் தண்ணி! பருப்புக்கு தண்ணி கணக்கு இல்ல! அரிசிக்கு மட்டும்தான்!கூடவே தக்காளியையும் போடுங்க!

* உப்புக்காரம் எல்லாம் சரி பாருங்க..!

* தண்ணி நல்லா கொதிச்சு பொங்கும்போது..ஊறவெச்ச அரிசி+பருப்பை குக்கர்லெ சேர்த்துடுங்க!

* நல்லா கலந்து விடுங்க..தண்ணி முக்கால் பாகம் சுண்டுனதுக்கு பொறவு..மூடி போட்டு உடனே வெயிட் போடுங்க..3- 4 நிமிஷம் மட்டும் ஹைல எரியவிட்டு, 10 நிமிஷம் சிம்மில் வெச்சிடுங்க!

* அடுப்பை அணைச்சிடுங்க..ஆவி அடங்குற வரைக்கும் மூடியத் திறக்காதீங்க..(15நிமி)..பிறகு திறந்து, கலந்து கொத்துமல்லி தூவி பரிமாறுங்க!

ரெண்டாவது முறை!

* புளிக்கரைச்சல், தண்ணி,உப்பு, மிளகாய்த்தூள், மஞ்சத்தூள் மட்டும் போட்டு..கொதிக்க வெச்சு அரிசிபருப்பு சேர்த்து சாதம் தயாரிக்கணும்!

*  பிறகு வாணலியில தாளிப்பு ஐட்டங்களை சேர்த்து, சாதத்தை வாணலியில் கொட்டி, ப்ரைட்ரைஸ் போல தயாரிக்கணும்! 


பக்க வாத்யங்கள்!

 அப்பளம், வடாம், பப்படம், அவிச்ச முட்டை, உருக்குன நெய் , தயிர், பூண்டு ஊறுகாய், இஞ்சிப்புளி சட்னி,இன்னும் பலப்பல..மனம் போல!


 எச்சரிக்கை! 

சாப்பிட்டு 10 - 15 நிமிடத்தில் பலன் தெரியும்..நித்ராதேவி மெல்ல அணைத்துக் கொள்வாள்!

இதுதான் ஒரிஜினல் கொங்கு முறை அரிசிபருப்பு சாதம்! மத்ததை நம்பி ஏமாந்து போனா..கம்பெனி பொறுப்பல்ல!

உன் பார்வை போலே.. !

 நான் அல்ல!

 காரணம் கண்கள்!
கண்களின் பாவை...
காணுமே பார்வை!
அழகாய்க் காட்டும் காலமும்
காரணம்!




ஏன் என்கிறாயா..
எப்படித் தவிர்ப்பது
என்னால் முடியவில்லை...!
எங்கெங்கும்
எழில்கள்!

கறுப்பில் ஒளி ஊடுறுவுமாமே

அது பொய்..!

உன் கண்ணில் பட்டுத் தெரிக்கிறதே!

தெரித்த ஒளி பட்டு கண்ணின்

வெண்மை சிவப்பானதோ?

என் கண்ணைப்பார் ..நீலமாக உள்ளதல்லவா

வானத்தைப் போல!

 உன் பார்வை போல..என்பார்வை தெறிப்பதில்லை!

காட்சிகள் கண்ணை ஊடுருவி விடுகின்றன!

காட்சிகள் அல்லவா..

கலைந்துவிடுகின்றன..

நிலைபெறுவது உன்னில்தான்!என் கண்களை விட்டுவிடு..

என்னை விடாதே..விலக்காதே!

எவ்வளவு சொல்லியும்

உன்னைக் காயப்படுத்திய ....

அளவில்லா அம்பெய்யும்

 என் கண்களை

தண்டிக்கிறேன் பார்!

நாளின் மூன்றிலொரு காலம்

திறக்கக் கூடாது என்றும்

கனவில் அம்பு விடக்கூடாது என்றும்!

 உன்னிலும் உண்டு..
உன்னில் மட்டும் இல்லை
உன்மேல் அதிகம் உண்டு..!

ஆடிப் பதினெட்டும் பாலங்களும்!

 தென்மேற்குப் பருவக்காற்று ஆரம்பிச்ச ஒரு மாசத்துல,  பொள்ளாச்சிலே எந்திரவியல் பட்டயப்படிப்புக்கு சேர்த்துவுட்டாங்க..அப்படியே ஹாஸ்டல்யும் மூணு பேர் இருக்குற அறையில் அடைச்சுட்டாங்க...திரும்பிப் பார்க்குறேன்..என்னோட பத்தாப்பு படிச்ச பய முக்கால் பேண்ட் போட்டுட்டு நிக்கிறான்.."வாடா ரேங்க் வாங்குன நீயும்,குறைச்ச மார்க் வாங்குன நானும்..ஒரே காலேஜ், ஒரே ரூம்'னு வெறுப்பேத்துனான்!

கோவமா வந்தாலும், தெரியாத தேவதைக்கு தெரிஞ்ச பேயே பரவாயில்லன்னு சமாதானம் பண்ணிக்கிட்டேன்...ஆளு கொஞ்சம் சிறுசானாலும்,நம்மள விட உலகஞானம் ஜாஸ்தின்னு போகப் போக தெரிஞ்சது!


இப்பெல்லாம் பசங்க, ஒருநா க்ளாஸுக்குக் கட் அடிக்கவே பயப்படறானுக..புதுப்படம் ரிலீஸ் ஆனாலோ இல்லே படப்பிடிப்பு டீம் காலேஜ்க்கு எதுக்கால இருக்குற பயணியர்விடுதியிலெ வந்து இறங்குனாலோ, ' மாஸ் கட்" தான்!
அதுலேயும் 'மண்டே மாஸ்கட்" ரொம்பப் பிரபல்யம்!

ஹாஸ்டல்ல காலைல 6 மணிக்கு சீனியர் பக்கத்து அறைகளில் இருந்து கூட்டமா விசில் சத்தம், தொடர்ச்சியா 5 நிமிஷத்துக்கு விடாமக் கேட்கும்..அதான் சிக்னல்! நேரா மெஸ்ஸுக்குப் போய் சாப்பிட்டுவிட்டு, 8 மணிக்கெல்லாம் எல்லோரும் வெளியா போயிடணும்.பஸ்ஸுல வர்ற வெளிப்பசங்கள கேட்லயெ நிறுத்தி, கூட்டிட்டுப் போயிடுவாங்க!

மொதல்ல கண்டிச்ச நிர்வாகம், பசங்க பண்ற குறும்பப் பார்த்து மாசத்துல 2 நாளைக்கு மேல கட்' அடிக்கக் கூடாதுன்னு எழுதப்படாம ஒப்பந்தம் ஆயிடுச்சு!

அந்த வருஷம் ஆடிப்பதினெட்டுக்கு, ஊருக்குப் போகவிருந்த என்னை,நம்ம ரூம்மேட் தொல்லை பண்ணி..ஆழியார்டேமுக்குக் கூட்டிட்டுப் போயிட்டான்! ஏண்டா...அவனோட போணோம்னு ஆயிடுச்சு!

காதலிக்க நேரமில்லை படத்துல ரேடியோப் பெட்டிய பார்க்ல இருக்குற சின்ன பாலத்துலெ இருந்து, ராஜஸ்ரீ போடுவாங்க இல்ல..அதே பாலத்து மேல நானும்..அவனும் நின்னுட்டு இருந்தோம்!

பொண்ணுங்க கூட்டம் ஒண்ணு கடந்து போச்சு..உடனே நம்ம தொல்லை என்ன பண்ணினான் தெரியுமா...ஜன்னல் வெச்சு, பஃப் கை ஜாக்கெட் போட்ட ஒரு பொண்ணப் பார்த்து, " டிசைன் பாப்பா டிசைன்" நு கத்திட்டான்!

அப்புறம் ரொம்பப் பாவமா மூஞ்சிய வெச்சுட்டு நின்னுட்டான்..அந்த பொண்ணுக திரும்பி பக்கத்துல இருந்த நான் தான் கத்துனேன்னு தெளிவா முடிவு பண்ணிட்டாளுக..! கொஞ்ச நேரம் கடுமையா மொறச்சுப் பாத்தாளுக..ஒண்ணுமே பேசல..போயிட்டாளுக!
நமக்கு வாழ்க்கையே வெறுத்திருச்சு..குசும்புக்காரன் அடக்க முடியாம சிரிக்கிறான்! அன்னிக்கு முடிவு பண்ணதுதான்..கூட்டமா பசங்களோட பராக்குப் பாத்துட்டு நிக்கிறதில்லன்னு!


நீங்களும்..பார்த்துங்க..ஆடி 18 அன்னிக்கு பாலத்துக்குப் பக்கம், தொல்லைகளோட போகாதீங்க..
ஆனா..தனியா போங்க!

நட்பின் அவசியமும், அவசிய நட்பும்!

 அறிமுகம் அம்மாவின் மூலம் ஆரம்பம்..முதல்ல அப்பா..ஏறக்குறைய ரெண்டு பேரையும், குழந்தைகள் DNAவாசனையை வைத்துக் கண்டுபிடித்துவிடுகின்றன!..வளர வளர..எடுக்கும், அரவணைக்கும் கைகளை அம்மாவின் உதவியோடு இனம்   கண்டு கொள்கிறது! உறவுமுறைகளை உணர்ந்து கொள்கிறது!

 எடுக்கும் கைகளில் குழந்தை மாறிமாறி செல்கையில் மனிதர்களில் மாற்றத்தை உணருகிறது! வீட்டிலிருந்து வாசலுக்கு  வருகையில் 'நட்பு' அறிமுகமாகிறது..சக குழந்தைகள் மூலம்!

பள்ளிக்குச் செல்லுமுன் உடன்பிறப்புகள் வந்துவிட்டால் நலம்! விட்டுக் கொடுத்தல் என்பது புரிந்து விடும்!சகோதரங்களுடன் வளரும் குழந்தை அனுசரித்துப் போகப் பழகிக் கொள்கிறது!
அனுசரிப்பே பிறமனிதர்களோடுக்கூடிய பரிவு,அன்பு,பழக்கம்,பாசம் ஆகியவற்றின் அடிப்படை!


அனுசரிப்பு எனும் அடிப்படையின் ஆதாரம்..எண்ணங்களின்,விருப்பங்களின்,செயல்களின் -- 'அலைவரிசை' !

அலைவரிசை ஏற்புடையாதாக இருப்பின் அனுசரிப்பு இயல்பாகிறது.!..பலசமயம் அலை மோதும் அலைவரிசை, ஈகோ எனும் சுயமேலெண்ணத் தடையால்.!.காலமும்,அவசியமும் அத்தடையை உடைத்து, கட்டற்ற அலைவரிசையை 'பண்பலை'யாக மாற்றித் தருகிறது!

 விதை செடியாகி,மரமாகி மணம் வீசுவதைப் போலவே நட்பும்!
மரம் பூக்கும்,காய்க்கும்,கனிதரும் அதே சமயம் நோயும் தாக்கும்! அதையெல்லாம் தாங்கியும் வளரும்..நட்பும்!




நட்பும் எதிர்பார்க்கும்..சிலசமயம் அவசரத் தேவையை..ஆனால் பெரும்பாலும் 'சமத்துவ'த்தை!வர்க்க,இன,பால்,வயது,அந்தஸ்து எது தடுத்தாலும், நடத்தையில், எண்ணங்களின் வெளிப்பாட்டில் நட்பு எதிர்பார்க்கிறது 'சமத்துவத்தை!'

நம் இடத்தை விட்டு வெளியில் சென்றால்"நட்பின்" உதவியின்றி எதையும் சாதிக்க முடியாது! சாதிப்பது பிறகு.. சரிவர நடைமுறைக்கு அவசியம் 'நட்பு'!
நட்பே நமக்கு வாழ்க்கையைக் கற்றுத்தரும்..வழிநடத்தும்!

நட்பு புதுவித பலத்தைக் கொடுக்கும்! போராடத் துணிவைக் கொடுக்கும்! விட்டுக் கொடுப்பதை, அதனால் மனங்களை வென்றெடுப்பதை சொல்லிக் கொடுக்கும்!

ஒரே பகுதியில் வசித்தோமெனில் நீண்டநட்பு கிடைக்கும்..ஆனால் எண்ணிக்கையில் குறைவிருக்கும்!
இடம்மாறும் வாழ்க்கையில் நட்பில் பலமிருக்காது..அவசியமே மேலோங்கி இருக்கும்..ஆனால் எண்ணிக்கையோ பலமடங்கு.!இங்கு நட்புகள் மறையும்..புலரும்..சூரிய சந்திரரைப் போல!

நட்பு வெளிப்படுவது கருத்து பரிமாற்றத்தில்..முக்கியமாக அளவளாவதில்...! தடை அதிகமில்லா சுதந்திர எண்ணப் பரிமாறல்கள் நட்பில் மட்டுமே சாத்தியம்!
இரு(ற)ந்தாலும் நம்மை சுமப்பது நட்பே!

நட்பு புன்னகையில் ஆரம்பித்து,தலைமுறைகளில் தொடர வேண்டும்!
நம்மால் முடிந்தவரை நிறைய நட்புகளை சம்பதிப்போம்!

உடன்பிறந்த உறவா..தொந்தரவா?

ஒருஜோடி பயனாளர் கூடி பெற்றெடுக்கும் ரத்தினங்கள்

பொதுவாக ஒற்றைக் கருவறையில்

சிலவாக புதுப் புது தனித் தனி அகங்களில்

அபூர்வமாக வாடகை அறைகளில்

ஆதிமூலக்கூறு ஏகதேசம் சரியாகவும்

காலவித்தியாசத்தாலும்

பெறுபவர்களின் மனவோட்டத்

தன்மை மாறுபாட்டாலும்

பூர்வஜென்ம பாவ புண்ணிய கணக்குகளாலும்

பாலிலும் பருவத்திலும் அழகிலும் கருத்திலும்

சற்றே மாறுபட்டு

வெளிவந்து தொடர்ந்து அருகாமையில்

வளரும் உறவுகள்...

உடன் பிறந்தோர்!

பாட்டன்,அப்பன்,ஆத்தா,அம்மா,மனை/துணை, 

மைதுன உறவுகள், மக்கள்,பெயரர்கள்..

இறுதியாக நட்பு..எல்லாம் டூப்பு!

உடன் பிறந்தோரே டாப்பு! 

எதில்?

காலமெல்லாம் நம்மோடு வருவதில்!

சிணுங்கல்கள் செல்லச் சண்டைகள்

முதலாம் பருவத்திலும்

பிரிய மற்றும் ஆணைகளால் பங்கீடுகள் அடுத்ததிலும்

இரும்புச்சங்கிலி போல் உறுதியாய் வலுவடைந்திருக்கும்

பெற்றவர் மனம் இறுமாப்படைந்திருக்கும்

மூணாம் எட்டு பருவத்திலே!

பெற்றமரம் ஆலமரம் என்றால்தானே விழுதுகள் விழும்!

ஆலமரங்கள் குறைவுதானே..

தென்னைகளும் முருங்கைகளும் தானே இங்கு அதிகம்!

மரங்களில் தங்கும் பறவைகளின் குணம்

மரத்தின் காய்களுக்கும் வந்துவிட்டது..

றெக்கை முளைத்ததும் பறப்பதைப் போல்!

தொப்புள்கொடி உறவுகள் 

ஒருசெடியின் மலர்களாக ஒரு தோப்பு குயில்களாக

ஒரு தென்னை குலைகளாக...

பெரும்பாலும் 

ஒரு ஆலையில் தயாராகும் கார்களாக

மாறிப் போவது காலத்தின் விந்தை!

இயக்கம் ஓட்டுநர் கைகளில்!

புதிதாக வரும் மைதுன உறவுகளில்!

துணைகள் இடையே எத்தனை எரிச்சல்,

ஆவேச பரிமாறல்கள்..வெறுப்புகள்

அபூர்வமாக அன்பு பங்கீடல்கள்!

திருமணத்திற்குப்பின் அன்பு ரோஜாக்கள்

ஆவாச தே'வதைகளாக மாறிப்போகும் விந்தை என்ன?

அதிக பாதிப்பு ஆண் உடன் உறவுகளுக்கே!

விளையாட்டுச் சண்டை வினையாகிவிடுகிறது

புதுமனைகளால்...!

தொப்புள் கொடி பெண்சகோதரிகளின் கணவர்கள்

சகலைகளாம்..ஆனால் அவர்கள் ஆவார்களே

கட்டாயாச் சகோதரர்களாக!

இருபால் உடன் உறவுகளை ஈர்ப்பது இணைப்பது

அண்ணியின் கைகளில்..

இளைய உறவின் வரவின் வாய்களில்!

ஏறக்குறைய நம் வாழ்நாள் முழுதும் உடன் வருவது உறவா..தொந்தரவா

உடன் வருவது எனில் அது நம் அங்கம் போன்றதன்றோ..

அதில் பங்கம் வரலாமோ?

உடலில் தலையே பிரதானம்..

உடன் பிறந்ததிலும் தலைமகனே/மகளே பிரதானம்!

முன் ஏர் செல்லும் வழியிலெயே பின் ஏர் 

செல்லும்..

செல்ல வேண்டும்..

செலுத்த வேண்டும்!

வேண்டும் நலம்!

கோச்சை சேவலும் இட்லியும் பின்னே நானும்!

ஒரு கவிதையோ,திரைப் பாடலோ, கலைஞ்ரோ ,தலைவரோ பிரபல்ய மாகவேண்டுமெனில் அனைவரையும் கவர்வதாக அமையவேண்டும் !


கால வெள்ளத்தில் புதிது புதிதாக பல நவீனங்கள் நமக்கு அறிமுகமாகும்!
உலகமயமாக்கல் காரணமாக கலாச்சார பரிமாற்றங்கள் தற்போது வேகமாக நடந்தேறி வருகிறது! அவற்றில் ஒரு கலாச்சாரத்தின் உணவுகளும்,உடைகளும் பெரும்பங்கு வகிக்கின்றன!


ஏகோபித்த ஆதரவை அறிமுகமாகும் இடத்தில் பெற்றாலன்றி நவீனங்கள் எரி நட்சத்ரம் போல பொலிவிழந்து விடும் !


நவீனங்கள் வந்து பிரபல்யமானாலும், மனம் ஒருகாலையில் சலிப்படைந்து, தன கூட்டுக்கே திரும்பி வந்துவிடுகிறது! என்னதான் ஜீன்ஸ்,சுடி அணிந்தாலும் வேட்டி,சேலை அழகு வருமா? புரோட்டா,பிஸா,பிரியாணி,சில்லி என்றாலும் 


"தயிர்சாதம், இட்லி, சாம்பார், நாட்டுக் கோழி குழம்பிற்கு "இணை நமக்கு உண்டோ?


மதுரை முருகன் இட்லிக்கடையில் முகப்பில் இருக்கும் வாசகம்..


இட்லி ஒரு உன்னதமான உணவு ! - திருவாசகம் ..


எந்த நாட்டினருக்கும்,வயதினருக்கும் உகந்த உணவு! இட்லியின் அண்ணன் 
"தயிர்சாதம் "! சமைக்க,சாப்பிட,ஜீரணிக்க எளியவை!

பெரும்பாலான மத்திய வயது ஆண்கள் மெல்ல சமையலறையில் புகுந்துவிடுகின்றனர்! முதலில் ஆலோசனை..பிறகு தள்ளு .உனக்கு ஒண்ணுமே தெரியல ..என்று அடுப்பை! குடும்பஸ்திரிகளும் விட்டது சனி என்று மகிழ்வுடன்! 
ஞாயிற்றுக் கிழமைகளில் அசைவம் சமைக்கும் வீடுகளில் பெரும்பாலும் ஆண்கள் கைவண்ணம் தான்! எண்ணெய்,நெய் தாராளம் என்பதால் ருசி கூடி குழந்தைகள் ஆதரவு வேறு!


http://www.arusuvai.com/ இருக்கும் போது என்னகவலை ?

கொலச்ட்ரால் அதிகம் என்பதால் ஆட்டுக்கறி நிறுத்தியாகி விட்டது ! டேம் மீன்கள் வருடம் 4 மாதம் மட்டுமே கிடைக்கும்! எனவே கோழி மட்டுமே கதியாகி விட்டது! ப்ராய்லர் சலிப்பு! இறுதியில் சரண் நாட்டுக்கோழி தான் !




நாட்டுக் கோழி நல்ல ருசி என்றபோதிலும், சதையை விட எலும்பே அதிகம்!
அப்போது தான்,கடைக்காரர் எனக்கு "கோச்சை சேவல்" அறிமுகம் செய்தார்!
ஆட்டுக்கறி தோற்றது போங்கள்! நல்ல சதைப்பற்றும் கூடவே ருசியும்!


கோச்சை சேவல் என்பது சண்டைக்கு வளர்க்கும் சேவல்!தானியங்களைப் போட்டு செழு செழு என வளர்ந்து நிற்கும்!உரித்த பின்னும் 3 - 5  கிலோ எடை இருக்கும்! தேவையான அளவு வெட்டிக் கொடுப்பார்கள்!


எளிய முறை கோச்சை சேவல் சுக்கா குழம்பு!

* அரைக் கிலோ கறியை குழாய் தண்ணிரில் பலமுறை நன்கு அலசி வடிகட்டவும்.
* எட்டு பல் பூண்டு, இஞ்ச் நீள இஞ்சி பேஸ்ட்
* பொடிக்க: சீரகம், மிளகு தலா ஒரு தேக்கரண்டி,பட்டை மூணு துண்டு, ரோஜா மொக்கு ரெண்டு,கிராம்பு ரெண்டு!
* குக்கரில் நாற்பது மில்லி நல்லெண்ணெய், பத்து சொட்டு விளக்கெண்ணை ஊற்றி சூடாக்கி, பேஸ்ட் போட்டு வதக்கவும்! ஒரு நிமிடம் கழித்து கறியைக் கொட்டி பிரட்டவும்! உப்பு,அரைத்த பொடி, மிளகாய் தூல் ஒரு தேக்கரண்டி கலந்து பிரட்டி, ஒரு கிளாஸ் தண்ணீர் விடவும்!
* மூடி குண்டு போட்டு நான்கு விசில் வந்ததும் அடுப்பை அணைக்கவும்
*ஆவி அடங்கும்வரை காத்திருந்து தாளித்துக் கொட்டி,சிறிது வெண்ணை சேர்த்து ஏழு நிமிடம் சிம்மில் வைக்கவும் .
* சுக்கா தயார்!


சைவர்களுக்கு எளிய கோவை அன்னபுர்ணா தேங்காய் சட்னி!


* அரைமூடி உடைத்து, பின் தோல் சீவிய தேங்காய் துண்டுகள், ரெண்டு பச்சை மிளகாய் ,உப்பு மட்டும் போட்டு தண்ணீர் விடாமல் மை போல் அரைத்து,தாளிப்பு சேர்க்கவும்.  


இப்போதெல்லாம் அதிகம் வெளியே சென்று அசைவம் சாப்பிடுவதில்லை ..
ஆர்வமுடன் செய்து பாருங்கள் ..நண்பர்களே ..
நம் கைப் பக்குவம் ..வயிற்றுக்கும் ..வாழ்க்கைக்கும் நல்லது!
வீட்டம்மணிகளும் வாய்திறக்க முடியாது!


ஒரே கல்லுல ரெண்டு மாங்கா!




(ஏற்கெனவே கோச்சையின் மகத்துவத்தை நண்பர் ஒருவர் பதிவிட்டிருந்தாலும் , என்னுடைய அனுபவத்தையும் வலையேற்ற ஆசை கொண்டேன்!..)

ஓ.. ரசிக்கும் சீமானே!

  அன்பர்களுக்கும் நண்பர்களுக்கும் வந்தனம்!

இளவேனிற் காலத்தின்
வாயிற்படிகளில்
வான் மழையோடு மரங்களை
புதுப்பிக்க வரும்
வசந்தருதுவை
வரவேற்கக் காத்திருக்கும்
பூவுலகம்!
மதுரையின் மணக்கும்  குண்டுமல்லிகை
செண்டோடு!

துளிர்க்கும் புது இலைகள்
கார்மேகத்துடன் போட்டியிட்டுத் தருமே
கோடையின் தாக்கத்திற்கு
தலைகவசம்!
ஸெந்தூரமாக சிரிக்குமே
பெருமையுடன் வழியெங்கும்
மே மலர்கள்!

படரும் வெப்பம்
தொடரும் சோகம்
ஆற்றாமைத்தீர
குளிர்மலைகளை நாடுமே
புதுமணங்கள்!

என்னே விந்தை!
குளிர்ச்சி தரும் இயற்கை ..
பனைகளிலிருந்தும்
புழக்கடை தர்பூசணி
படர்கொடிகளிலிருந்தும்
சிறுதும் பெரிதுமாக ...!


தென்றல் வரவில்லை
இன்னும் தணியவில்லை..
மீதமிருக்கும்
பகலின் காற்று!
வெற்றுவெளியில்
தலைக்கு கையை அணைத்துத்
தேடுவோம் வானத்தில்
பிரியமானவரை..!
முகம் தெரிந்தவுடன்
ஆஹா... தென்றலும் புறப்பட
புன்னகையுடன்
விடைதருவோம் கண் மெல்லமூடி..!

இருக்கும்போது கவனமின்றி
விலகும்போது மனம் தேடும்
உறவுகளாய் ஆனதே 
தண்ணீர்!
சச்சரவின் தாக்கம்போல்
தவிக்கவிட்டு தேடி அலையவிட்டு
உணர்த்திடுமே தன்னை யாரென்று!


மாதமேன்னவோ மார்கழி ஆகலாம்!
ஆனால் நிலவேன்னவோ
சித்திரை நிலவு ...!
அன்று அவள் நமக்கு மிக  அருகில் வருவாள்!
தாயாக..
வளர்ந்தபின் துணையாக ..!


ஓ..ரசிக சீமானே!
எதுலிருக்கு..எதிலில்லை..!
இங்கிருக்கு ..அதிலிருக்கு..!
எதிலுமிருக்கு..எங்குமிருக்கு ..!
விருப்பத்திலும்..வெளியிலும் ..!
ஓடிவா..ரசிக்கலாம்!

ரசிகன் ..மனிதன்..தலைவன்..ஆசான்.!

எது எடுத்தாலும் மூணு!

என்னுடைய எழுத்துக்கு என்று அடையாளம் ஏதும் இல்லாமல் கண்டபடி சுற்றிக் கொண்டிருந்த என் சிந்தனை வெள்ளி மூக்குக்குதிரை யைக் கடிவாளம் இட்டு நிறுத்தி, விவகாரமாகவோ,இலக்கியத்தரமாகவோ உன்னிடம் எதிர்பார்க்கவில்லை! ஜாலியா..எழுதுப்பா என்று ஊக்கமளித்த என் வலை உலக நண்பர்களின் அன்பு எச்சரிக்கையை அடுத்து அவர்களின் உத்தரவை சிரமேற் கொண்டு இனி உங்கள் இதயத்துக்கு இதம் அளிக்க இதோ!

ஆமா ! அது என்ன தலைப்புல மூனாங் கணக்கு ஒன்னு வெச்சிருக்கேன்னு கேட்டாக்க, அது என்னோட அனுபவம்னு சொல்வேனுங்க! ரொம்ப நாளா நிறைய  படிச்சி ஆராய்ச்சி பண்ணி நானும்,வீட்டு அம்மணியும் ஒரு முடிவு செஞ்சி வெச்சிருந்தோம்! ஆனா, அதை முதல்ல ஏதாவது ஒரு பாவப்பட்ட சீவன் கிட்ட சொல்லி செஞ்சு பாக்குறதுன்னு முடிவாயிடுச்சு!

ஒருநாள் என்னுடைய ஒன்னு விட்ட மச்சினர்களோட வீட்டு அம்மணிக,அக்காளும், தங்கையுமா ரெண்டு பேர் உரம்பரை அதாங்க  உறவின் முறைக்காக விருந்துக்கு வந்தாங்க!பத்து பனிரெண்டு வயசு சின்னவங்க!அதனால பயமில்லாம என்கிட்டே பேசிட்டி இருந்தாங்க! 

என்ன ரெண்டு பேருக்கும் சரியான போட்டி போலிருக்கு..எடை போடறதுல! அப்படின்னு நான் கேட்கவும், எங்க வீட்டம்மா சோதனை எலிக கிடைச்சாச்சுனு              

சந்தோஷத்துல, நாங்க சொல்றபடி கேட்டா, உடம்பு எடைய குறைசசிரலம்னு சொன்னாங்க! அந்த பேக்குகளும், எங்க மேல இருந்த நம்பிக்கைல சரி சொல்லுங்கன்னு கேட்டுச்சுக! ஒரே வரில எங்க திட்டத்தை சொன்னதும், அவங்களுக்கு ஆனந்தம் பாதி..எரிச்சல் மீதி!

அவிக ரெண்டு பேரும் எந்நேரமும் தின்னுட்டு, தூங்கிட்டு,டிவி பாத்துட்டு பொழுத கழிக்கிரவங்க! அவங்க கிட்ட திட்டத்தை சொன்னமே, செய்வாங்களானு எங்களுக்கு சந்தேகம் தான்! மூணுமாசம் கழிச்சு கோவில் திருவிழாவுல பாத்த போது அக்கா எடைய 5 கிலோ கம்மி பண்ணி ஜம்முனு இருந்தா!தங்கச்சிக்காரி அப்படியே தான் உருண்டு போய்டிருந்தா! அக்காவுக்கும் எங்களுக்கும் ரொம்ப சந்தோசம்!

அது என்ன ரகசியம் ஒண்ணுமில்ல! இதுதான்!

" உங்களுக்கு பிடிச்சது எது வேணாலும் சாப்பிடுங்க!" இதுதான் அவங்க சந்தோஷக் காரணம்!

"ஆனா மூணு சர்விங் மேல போகக் கூடாது" இதுதான் அவிக எரிச்சலுக்குக் காரணம்!

இட்லி ,தோச ,சப்பாத்தி- எதுன்னாலும் மூணு எண்ணம் தான் !

சாப்பாடு - மூணு கரண்டி !

சைஸ் ஆளுக்கு ஏத்த மாதிரி !

உடம்பு எடையைக் குறைக்க முதல்ல பயிற்சிக்கு போயிடக் கூடாது! வாய கட்டறதுக்கு பழகணும்! சிறிது எடை குறைஞ்சி உடம்பு லேசான பின்னாடி பயிற்சி எல்லாம்! 

நீங்க வேணும்னா செஞ்சு பாருங்களேன்!நீ ரொம்ப யோக்கியாமனு கேக்குறதுக்கு முன்னாடி நானே சொல்லிடறேன்! பாதி தான்னு! வாயக் கட்டிப்

போட்டா, ஒரு மாசத்துல ரெண்டு கிலோ இறங்குது! மறுபடி வெட்னா பழையபடி கூ டிருது!

பேரின்ப விலாசம்!

 இரவில் நிலவொளி இனிதென்பர் !
கோடையில் நிழலும்
வாடையில் குளிரும்
கருத்த மேகமும் அதையொத்த
கூந்தலில் பூக்களும்
மழையால் மணக்கும் மண்
நடுங்கும் பனியும்
பனியில் நனைந்த காலையும்
இனிதென்பர்!

நட்பின் நேசம் இனிதென்பர்!
தாயின் மடி பாசம்
தந்தையின் மன பாசம்
சேலையில் தெரியும் வண்ணங்கள்
வேட்டியின் வெண்மைகள்
மகளின் முத்தங்கள்
மகனின் தோள்கள்
பெயரர்களின் பாதங்கள்
சுகமென்பர்!

பரதமும் நாதமும் இனிதென்பர்!
கீசிடும் பறவைகள்
மானும் மயிலும் செல்ல பைரவரும்
கன்றுக்குட்டியின் கண்
பச்சை வயல்களும்
சோலைகள்
காண இனிதென்பர் !

வானொலியும் காண் ஒளிகளும் இனிதென்பர்!
இளமையும்
இளமையின் வாளிப்புகளும்
வண்ணங்களும்
வர்ணிப்புகளும்
வடிகால்களும்
பரமானந்தமே என்பர்!

அள்ளக்குறையா வளம் இனிதென்பர் !
கைக்கெட்டும் தூரத்தில்
அலங்காரங்கள்
அழகுகள்
பயணங்கள்
மயக்கங்கள்
அருமைஎன்பர்!

பரம்பொருளின் உறைவிடங்கள் இனிதென்பர்!
அதற்கு போட்டியிடும்
தத்தமது குருவிக் கூடுகள்
கிராம தேவதைகள்
திருவிழாக்கள்
வேடிக்கைகள்
சீண்டல்கள்
சண்டைகள்
வாழ்வென்பர்!

நாம் அழ ஆரம்பித்து
நமக்காக
அழுது முடிக்கும்வரை
இயற்கையோடு  கலந்தவை
இரண்டு சுகங்கள்!

பேதமில்லா ஆருயிர்க்கும்
வேண்டும்
கிடைக்கும்  சுகங்கள்!



மறுமை உலகை யாரும் கண்டிலோம்!
பிறந்த உலகே
நமக்கு பேரின்ப லோகம் !
அதற்கு விலாசங்கள்
நாளின்  முப்பெரும்   பொழுதில்
விருப்ப உணவும்
தற்காலிக மரணமான உறக்கமும் !

இயற்கையின் சுகமொன்று உண்டெனினும்
அது சுகமானந்தம்!

எந்நாளும் நித்திரை ராணியின் அரவணைப்பும்
முப்பொழுது அன்ன மாதாவின் அருளுமே
பரமானந்தம்!

சைஸ் ஜீரோ அழகிகள்!

 நண்பர்களே... வந்தனம்!

உண்டி சுருக்கின் பெண்டிருக்கு அழகு!...

இது மூதுரை!

'கொமரி ஒரு கொழந்தைக்கு ', என்பது கொங்கு பழமொழி!

பெருநகரங்களில் இன்று வசிக்கும் இளம் பெண்களின் கனவே, சைஸ் ஜீரோ தான்!

அது என்ன சைஸ் ஜீரோ? 

முகம் களை இழக்காமல், மெருகு குலையாமல், உடம்பில் எக்ஸ்ட்ரா சதை இல்லாமல் ஆரோக்யமாக இருப்பதைப் போல் தோற்றமளிப்பது தான் அது!


மார்பு - வயிறு - இடுப்பு இவற்றின் கீழ் மட்ட அளவை நிர்ணயிப்பது தான் சைஸ் ஜீரோ ! இதன் அளவு நாடுகளுக்கும் , பிராண்டுகளுக்கும் இடையே சிறிது வித்தியாசப் படுகிறது !

30 - 22 - 32  இஞ்ச்கள் (76 - 56 -81 செமி ) முதல் 33 -25 -35  இஞ்சகள்(84 -64 -89 செமி)
வரை உள்ள உடலமைப்பு சைஸ் ஜீரோ பிரிவுக்குள் அடங்கும்!




BMI  என்பது எடைக்கும். உயரத்திற்கும் உள்ள தொடர்பு !இதன் அடிப்படையிலும் சைஸ் ஜீரோவை நிர்ணயிக்கிறார்கள் !

BMI  18 முதல் 25  வரை உள்ள பெண்கள் ஆரோக்கியமானவர்கள் எனப்படுகின்றனர்! BMI  18 - 20 வரை உடலமைப்புக் கொண்டவர்கள் இவர்கள்!

பெரும்பாலும் இவர்கள் புரதம், பழம் மட்டுமே எடுத்துக் கொள்கின்றனர்! மாவு , பால் பொருள்களை இவர்கள் வெறுக்கின்றனர் !

மாடல்களுக்கும் நடிகைகளுக்கும் அவர்களின் தொழில் அடிப்படையில் சைஸ் ஜீரோ தேவைப்படுகிறது! ஆனால் புலியைப் பார்த்து மற்ற இளம் பெண்களும் இதைப்போல் உடலை வருத்தி சூடு போட்டுக்கொள்கின்றனர்!

இந்த சைஸ் ஜீரோ ஆரோக்கியமானதல்ல என்று மருத்துவர்கள் எச்சரிக்கின்றனர் !

பெண்களே ஜாக்கிரதை !

அசத்தல் திருமணக் காட்சி!

 அசந்து போனேன்!

இந்த திருமண படக்காட்சியைக் கண்டு!

கேரள இந்துக் குடும்பத்தின் திருமணக் கோலம்!

அந்நியோனியமான மணமக்கள்!

கண்ணை உறுத்தாத அலங்காரம்!

அசத்தலான வீடியோ எடிடிங்க்!

விண்ணைத் தாண்டி வந்த இசைப் பிண்ணனி!



மனதைக் கொள்ளை கொண்ட படக் காட்சி!